Joriy yilning 30-avgust kuni Nurafshon shahrida O‘zbekiston Respublikasi mustaqilligining 35 yilligiga bag‘ishlangan tantanali marosim bo‘lib o‘tdi.
Tantanali marosimda Toshkent viloyati hokimi Zoyir Mirzayev so‘zga chiqib, yig‘ilganlarni O‘zbekiston Respublikasi davlat mustaqilligining 35 yilligi bilan samimiy muborakbod etdi.
Viloyat hokimi o‘z tabrigida mustaqillik yillarida mamlakatimizda amalga oshirilgan ulkan o‘zgarishlar, inson qadrini yuksaltirishga qaratilgan islohotlar, aholi farovonligini oshirish borasidagi ishlar haqida to‘xtaldi.
Shuningdek, Toshkent viloyatining iqtisodiy salohiyati ortib borayotgani, yangi investitsiya loyihalari, ish o‘rinlari, zamonaviy uy-joylar va obod mahallalar barpo etilayotgani, Nurafshon shahri yangi taraqqiyot markaziga aylanib borayotgani qayd etildi.
Dutor va doira sadolari, maqom navolari, estrada xonandalarining chiqishlari, she’r va raqslar, sportchilarning mahorat namoyishlari hamda harbiylar ishtirokidagi maxsus kompozitsiyalar bayram dasturiga alohida fayz bag‘ishladi.
Sportchilarning kuch, chaqqonlik va mahoratni namoyon etgan chiqishlari tomoshabinlarda katta taassurot uyg‘otib, bayram shukuhini yanada oshirdi.
Maydonda bayram shukuhidan masrur hamyurtlarimizning shodon kayfiyati, sho‘x raqslar zavqi hukm surdi.
Tantanada dronlar shousi barchaga ko‘tarinki kayfiyat bag‘ishladi.
Musaffo osmonimizni bezagan mushakbozlik bayramga o‘ziga xos fayz va unutilmas zavq bag‘ishladi.
Osmondagi rang-barang shu’lalar go‘yo xalqimizning ezgu orzu-niyatlari, ertangi kunga ishonchi va yurt kelajagiga bo‘lgan umidlarining yorqin timsoliga aylandi.
Yashasin mustaqil O‘zbekiston!
Mustaqilligimiz abadiy bo‘lsin!